進度大躍進-公仔絲花花球 X 自家排版結婚相

呢個星期完成左好多野呀!

首先,終於confirm左花球啦
之前一直都掙扎到底好唔好要多個花球
因為之前已經DIY左一個細既

但後來又覺得呢個真係有D細

而我自己一向唔中意收花,而鮮花球既價錢真係好貴, 反而絲花仲可以轉讓又CUM擺CUM睇
另一方面我又想將花球加入獨特既元素,於是就想搵麵包超人公仔絲花花球

最後....搵到一間唔錯既花店
價錢合理,因為我已為兄弟姊妹做左手花,襟花,MR LI又有
於是佢既套餐我用唔著,我只要主婚人既襟花,佢老闆好好畀左個優惠價我

而我可以搵一對唔超過10CM既公仔,因為我已打算用麵包超人同BB超人

我影完畀佢睇,佢仲畀左好多參考相我睇

又願意同我傾,畀意見我,佢覺得可以用黃黃地去襯托出活潑既感覺

最後我同MR LI傾完,覺得佢既意見好好

因為我地係大舞臺擺,本身地方都紅,本身我中意粉紅色,但我怕太撞
開頭想做淺藍,但冇啦啦一點藍又唔襯

於是...最後打算做個類似既...

佢到時收到公仔會再幫我襯色
初步覺得呢個感覺好清新呀!於是就落左訂了
我都要盡快物色下岩SIZE既公仔先

好啦,分享完靚靚絲花球,係時候分享我用兩個鐘排既結婚相簿啦

呢間公司係幾年前係書展join過,相簿質素一流,同MR LI拍拖以黎既聖誕相我都用呢間鋪頭整相簿
我一直都想將D冇執過,唔會擺落PW相簿既相整一本私家相簿
所以今年書展就去睇下有冇相簿package啦,點知佢做緊呢個promotion
咦,呢個價包一本A4SIZE, 30頁硬皮相簿連書套,風琴式簽名冊,仲送多樣野
我地揀左photo drawer,咁黎既人可以好似寫postcard咁寫下野畀我地
我仲買多左2本相簿,1本整番上年聖誕相,另一本諗住整BIG DAY或honeymood相
尋晚,諗住今日放假,就的起心肝夜晚排
我竟然一晚排好左!!我仲加左我地整PROPS,係屋企影既prewedding相,好開心呀!!!
呢D野真係要自己排先做到,題外話,因應佢系統唔會知你係書展優惠價,今日send單先,見到如果要咁整,有埋套同熨金,要成$1086,頓覺真係抵哂,哈哈哈
畀大家睇下丫
封面同封底:

哈哈,我覺得我都排得唔錯架!!
佢仲送封面熨金服務,攪掂哂D稿,揀埋相整簽名冊同photo drawer
7-10個工作天有貨!!好期待呀!!

送給兄弟姊妹同自己的禮物-令人不停心心眼的手勾系列收貨啦!!!

早係3月已經訂左手勾公仔筆
最初只係訂簽到MARKER筆,之後加下加下
訂埋結婚公仔、註冊筆、兄弟姊妹手襟花....
其實之前係一間I LoXX Weddxxx度問過,公仔寫20-29CM,之後叫我去相簿揀髮型
我已經O左咀,即係唔係度身訂造了
好在遇到呢間良心小店,好願意同我傾我想點整
我將MR. LI`畫既graphic版我地畀左佢做藍圖去整,因為圖中既婚紗唔會係現實中出現
但我好想將呢個我地立體化,我同MR LI左右眼都分別有粒癦,傾談過程中已講左想整埋
上星期已陸續收到相...今日收到實物...真係嘩左聲...好靚好中意呀!!!
畀大家睇下原圖先

畫當時仲未揀衫,只是憑空想像呀
公仔既實物:

MR LI個樣真係好神似呀!!!
最驚喜係佢既包裝

細心到有我地既名同日期

我地既手花同筆:

後面果2款筆一款係油性筆,另一款係原子筆
註冊原子筆係前幾日先落訂,因為知道佢暫時唔接今年內既訂單,好多謝佢肯做埋對筆
本身註冊筆佢用開墨水筆,但因為上次開會戴律師再三提醒我地用原子筆
佢好好人幫我去物色岩用既筆,呢支原子筆係扭出黎簽,不得不讚!!

手花戴上手好靚呀!

兄弟姊妹手花同襟花

當時我畀相佢照住整
由於兄弟既BOW係黑底藍波點,佢搵唔到呢款絲帶,
佢竟然用黑色底,之後用塗改液點波點,之後逐點油藍色!!!!好感動!!!
出到黎好似,雖然有D姊妹特徵太似,難D分辨
但大部份一睇都認得出,佢好細心係每個公仔後面有條小紙條寫左佢地既名
咁就唔會LO亂啦!
姊妹係一條珠鍊,兄弟係扣針同夾

真係好好好中意呢套公仔
我立即SEND左畀兄弟姊妹睇,大家都好開心
動蕩中,我們更需要為大家打打氣
最欣賞呢間小店真係為我地度身而做,連筆咁細個公仔都有我地既癦
多謝哂你呀!!!

期待已久超滿意的淘寶開箱(兄弟+新郎bowtie/斟茶套裝/掛飾/DIY用品)

心情大起大落的幾天,尋日收到好消息,就係....
由於之前清關既問題

其實呢堆貨已經係9月中送哂去集運大陸倉

到尋日先收到SMS話拎得

今日一次過拎,樣樣野都好滿意,一定要同大家分享!!

先黎個大合照

1. 囍字貼
淘左2款貼窗囍字,1個係麵包超人,本身MR LI諗住自己整,但因為電腦界字有排挑

都係畀錢人整好過,多謝WOW友的介紹,呢間真係好靚呀

另一個係絨既質地,感覺好襟!

2.新郎BOW

之前係百利見到要幾十蚊一個,淘寶15蚊人仔一個,質地好滑
好抵買,感覺又Grand少少

3.兄弟bow

我最喜歡既波點
呢個仲抵,3蚊人仔一個,真係爛左都唔會肉痛
更何況用一次,質地出乎意料地滑,波點亦好出
佢仲有好多唔同顏色架!

4. 囍字串

佢個包裝好攪笑,要自己穿起佢
每個喜係絨既心心,有幾個size
我地揀左中,貪佢可以要黎接新娘時攔住,又可以夜晚做裝飾
掛起左好靚呀
近鏡:

題外話,襯我個窗簾好girlish!

5.茶杯套裝

一見到個心心盤就覺得一定要買
潮得黎又有少少傳統色彩(真矛盾,哈哈)
一套有6隻杯,好似120人仔一套,唔知算平定貴呢..

6. DIY材料
話說好想整下個餅卡套
就買左熱風槍、浮雕粉同膠水印台
今晚立即開黎試左,好好玩,效果好好又容易處理
仲要真係MADE IN JAPAN架!價格相當合理
等我完成左再同大家分享呢個部份啦!

姊妹裙度身X第一次姊妹開會有感X姊妹分工

不得不讚呢個姊妹裙真係好有效率
我地約齊姊妹,係FB同佢講會上黎度身

多謝姊妹們的準時,7:00上到去,7:10走得

職員好快手,姊妹們都覺得好驚訝

而姊妹們12月再黎FINAL FIT就可以了

度完身,我地就開第一次既會

一路食,我就一路分享下進度如何

最最最需要佢地幫手既係接新娘環節,當日reception佈置,分工

反而事前就係當我完成rundown,就會畀佢地睇下有冇野要執漏

要人地幫你諗接新娘環節,當然要話畀人地知你自己想點

講真,我一向好唔贊成玩新郎要人地食便便狀物體

我更唔中意一式一樣既愛的宣言(即係「每月人工畀哂你,我既零用任你畀」果d)

因為我覺得好無謂,亦唔見得講完簽完真係會咁做(當然只係我個人感受)

我反而buy發自內心即時講幾句,冇預備,仲黎得真誠同感動

我亦同姊妹講左1d mr.li既底線,例如,佢對蕉有強烈不適反應,其實大家都係想玩得開開心心

唔想突然要送佢去急症,或者成日痴住個廁所,哈哈哈

分享完,我地開始諗下有咩好玩而係兄弟都可以enjoy,而唔係只問d得mr li知答案既問題

其他兄弟只係幫mr li頂懲罰,兄弟都好辛苦架

嘿嘿,原來沿住呢個大家共釋既方向去諗,大家會傾得好舒服好開心

更可以係既定框架下發揮創意,見到佢地傾到咁興起

作為準新娘我真係好感恩

有一班真心為我幸福而快樂的姊妹,有一班願意分享意見的姊妹

講完玩新娘,就講下大致既分工,利用姊妹既長處真係好重要

姊妹E驟眼睇為人較文靜,醒目女1名,搵佢跟戴律師就岩哂

姊妹V為機構有做MC,執生力高,一早已邀請佢做MC

姊妹K的的骰骰,外向,有條理,做RECEPTION最放心

姊妹J開心果一名,又識我同MR LI既舊同事,做RECEPTION迎賓一定令人賓至如歸,雖然條理方面有進步空間,但同姊妹K可以互補不足

仲有我既伴娘妹妹,由於佢仍係中學生一名,適逢12月考試,但我好想佢伴我出嫁

於是佢既重任就係全天候痴實我,幫我袋電話(得閒拎出黎SNAP SHOT下),跟實我就得了!

初步分工我好滿意,同大家講起時大家都覺得唔錯

最後我地講埋1D佈置,我會將我中意既裝飾畀大家睇下

下次再聚就傾下點佈置張台啦

再次感謝我的好姊妹,有你們同我一齊,我好放心,希望你地都享受當日!!

與戴律師的證婚會議

上回提到(都成幾個月前)提到,我地個證婚律師-戴秉信律師真係非常有心

會為新人舉辦婚姻籌備工作坊,分享作為一個證婚律師覺得重要既婚禮細節

令我最放心既係佢會係婚前約2-3個月同新人單獨開會,對大家有更深入既了解

方便當日介紹我地

上次Workshop已經講左除非MC係畀錢請或天生好似黃子華咁識攪氣氛

否則MC講既野盡量簡化,係播成長片段前兩個人加埋講一分鐘就夠,淨低留番畀戴律師講

因為MC同我地既關係,冇咩人有興趣(相信大家去過飲都好明白,有D人真係用成幾個字去講自己同新郎新娘點識,識左幾多年,對佢地有咩印象,有幾開心等等)

(加上自從上次我去飲,個MC竟然...係竟然話祝一對新人白年歸老後,

我極認同,我相信朋友唔會有心想咒你,但始終唔係專業MC,難免會怯場,相反,戴律師證婚多過我過海,我放心交畀佢)

而交畀佢既意思係咩?其實就係我地出場後,上左台,由佢同我地既對話當中講出我地既相識相愛經過

今日我地終於開會啦

我地約2:30見,2:05就到左

首先畀我地睇左D文件先..原來佢已經同我地整好左擬結婚通知書,又畀埋結婚證書既DRAFT我地對

睇完就開始傾...首先傾下平時既稱呼,我地既相識,點一齊等等

見佢一度傾一度寫,以為佢MARK低D重點啦

到最後,佢畀手上果份野我地睇,原來係當日既講稿draft!勁呀!因為我地既係一個happy wedding,

佢會因應我地講既野去度D攪笑位,睇埋,更放心當晚個氣氛!

佢亦好細心地再次提醒我地一D當晚既位同埋點解決大舞臺既先天缺點

我地唔會辜負你既細心同專業,一定會好好預備的呀!

真心推介戴律師,充滿正能量,專業,細心既律師

我唔知其他證婚律師事前會點同客溝通,但每次去飲個感覺個律師都好"打份工FEEL"

事但up埋一式一樣既野之後快快簽字走,對新人唔多了解

當然,冇 人話過證婚律師要做咁多額外野

所以我先更欣賞用心去準備每個wedding的戴律師!!

姊妹裙KO!!!

呢個item真係好易中伏

一早就決定訂造好多謝mr li既舊同事,除左介紹好好既婚紗鋪,仲介紹左呢間係百利既姊妹裙公司畀我當日我地本身約左6:00上去,但因為有野做改左7:00,上到去有個b2b試緊婚紗但負責人amy都好好,請我地睇住d衫先

擺出黎既款大概有20件,但其實每件都可以改款,所以個combination有好多好多
其實我上去先之已經有心水既配襯,由於我既晚裝係黃色同紅色,所以我枇想姊妹著米白拼桃紅裝飾兄弟用藍色bow tie,我講完後,amy立即搵左個款出黎,話大概感覺係咁我地send左幾張相畀姊妹睇,最後決定了呢個款

實物

網頁圖片

但我地會加長同將蝴蝶變桃紅
我地做5條長裙,每條$340,好合理,如果想另加披肩加$30,度身時confirm,因為一定要同裙一齊做
而佢一個月可以起貨,姊妹可以裙做起後等到臨big day前2星期先去試都得
姊妹們最遲10月15要去度身
哈哈,就係咁,過程好順利好開心,又唔洗受氣
落左$500訂,又ko左一個item
由於我之前落左訂請人幫我地既兄弟姊妹勾公仔手花,宜家firm左姊妹裙,可以send埋畀勾公仔師傅知
一次過ko兩樣野,哈哈哈!!

真感恩我既姊妹個個都爽,唔好扭扭擰擰,所以好快就可以決定!太好了1

婚前輔導第三課-五種愛的語言及溝通

眨眼黎到第三堂啦,今個月既UPDATE比較多
每節開始前都會同姑娘分享下呢個月既狀況
提到我地有少少鬧交,但詳細大家都已經忘記左
姑娘話佢從來都唔擔心我地呢一對,因為我地既特質同埋根基好穩固

上節既功課係講愛的語言同埋講大家如何處理衝突

愛的語言即我地如何向伴侶表達愛意,原來人人既傾向都唔同架
五種愛的語言包括:

1)肯定的語言:稱讚、鼓勵你既伴侶

2)精心的時刻: 每日抽時間去分享、傾聽、精心營造相處既時間

3)接受禮物: 呢個好易明,小至DIY,大至貴重既禮物

4)服務的行動: 你既伴侶想你做既事,可以係家務、按摩、接送等

5)身體接觸: 拖手、接吻、擁抱等等

做完功課,結果出黎我傾向第2,4,5, MR LI則好平均
每次做完功課都要大家一齊傾,傾完之後果晚,我趁MR LI落去買飯食
我靜悄悄執好間屋,佢番黎超開心,哈哈哈
姑娘話,知己知彼,愛的語言就好似世界各種語言咁,你伴侶講法文,你就去學法文
目的係為左令大家相處的更融洽,了解大家多D
用錯方法自以為愛對方,分分鐘有反效果架
如果你都想知你自己既愛之語,網上都有好多測驗架

今次既輔導畀我地去諗下平時大家點處理衝突
其實我地次次都會傾番感覺
今次最大得著係同MR LI夾好了,當佢想冷靜時,講聲我知
因為有時我好著急好想知咩事,之後會好易忟
姑娘亦提醒我地,當一去到忟既時候,要諗下自己到底係為住你愛既人唔開心而忟
定件事令你忟,定你自己唔知點算而忟

好多時為對方著急,就令自己情緒差

今日好準時落堂
最大既得著係姑娘用自己做左個好好既例子

話說佢尋日正日生日,而咁岩係佢先生既公公出殯

由於姑娘係基督徒,佢唔介意相沖唔相沖,但當佢同媽媽講,媽媽話,你唔怕,但你點知人地點諗?

於是姑娘去問先生同先生婆婆,婆婆話咁姑娘就唔好去啦,沖到邊個都唔好
姑娘問,婆婆會唔會唔開心,婆婆答唔會,因為佢都唔想
呢個故事令我地明白,好多時諗野由自己出發,我認為點點點,冇事既
但對方又會點諗呢?好多時諗野要諗3方面,自己,對方同環境,咁先夠全面
因為,發生誤會太易了,尤其伴侶關係,一世都要用心去經歷

離開中心後,MR LI話,"果篇BLOG我會打架,但你今日會唔會打?你幫我打"婚前輔導好有用,我覺得好值得做"
我笑笑說:「由第一堂我就知你覺得受用啦!」

結婚證書套DIY

呢個ITEM一直都想自己整架,
不過五月暑期活動報名日,講座等等忙到嘔
所有野都冇咩點郁呢,突然有一日.....

上次團購整花球個導師SEND左秘密email

邀請上次團購既同學仔以優惠價報結婚證書套DIY班
合我心意,價錢又合理
我當然第一時間去入數啦,呢樣野陪我地一世,我都好想花心思去整呢
我揀左同花球一樣的桃紅危

仲帶左我一個好多年前係日本買既麵包超人熨章
希望可以加埋入去

2個半鐘好快過,其實唔難整,但係真係好花心思,要好專注

最後,我將個熨章貼左係放相果邊
咁BIGDAY當日影相就可以影到個章啦
製成品真係好靚呀,我好中意呀,MR LI都盛讚呀!
好多謝導師既細心指導同預備~

婚前輔導第二課-婚姻都有生命?

由於第一節太多分享

輔導員將原先第一節既堂課畀我地拎番去做

呢個係一個連線練習,畀我地知道婚姻既周期

哈哈,呢個係我既答案,當然,最後發現我只係岩左第一個=.=

正確答案係1-3年係甜蜜期,唔洗多講,大家明
4-8年係疏離期,當第一個小朋友出世,焦點由對方變成只有小朋友,唔係唔想理你既伴侶,只係,冇時間
9-20年係憂苦期,小朋友慢慢大個,憂佢學壞憂佢讀書,而一般黎講夫妻二人各自亦或到達事業高峰,關係更遠
21-25年係覺醒期,小朋友出身,大個,開始意識到身邊果個咁多年黎仍不離不棄
25年以上係恩愛期,經歷幾許風雨,咁多事都捱過了,自然恩恩愛愛
及早知道婚姻既生命,唔代表可以阻止呢D時期發生,只係大家有個心理準備
準備攜手去面對
姑娘仲用左個好好既比喻
如果婚姻係一本書,婚禮只係封面,人人都會見到
豐儉由人,多D錢可以整精裝版,手緊D可以做平裝什至是但拎紙做封面
但書既內容,永遠只有你同你既另一半去品嚐
華麗鋪張既婚禮唔會帶畀你一段好既婚姻
著眼點是如何經營關係,不要本末倒置
叮一聲,我好認同,更感恩每次輔導其實都幫我地去建立關係,為將來作準備
今節本身係講原生家庭,
家庭造就了我們的性格思想
但其實我地仲有得揀,好的觀念可以保留,不認同的,就放下
不要再用「我阿爸阿媽都係咁架啦」做藉口了
我們都長大了,擇善固執,你懂的

再一次覺得好有得著
MR LI認為每次都令佢有好多思考消化空間,令佢的結慢慢鬆開
除了感恩,仍是感恩

第一次淘到寶

一直都好想淘寶,因為好多野都好靚同平
多謝carmen教我點集運,於是,我終於成功第一次淘寶了!

自從新居張床到貨後
我地一直用住張單人床單
(話時話,真係唔知點解單人得黎咁大張,竟然笠到我地既床)
我地都知道要買,但閒閒地一套幾百蚊走唔甩,於是把心一橫上去睇
咦,好襯我地間房,又係最愛既波點,計埋都只係$140 hkd
抵!!於是買了,carmen仲好好地夾埋一齊運
到手後,我跟佢指示用鹽水浸一浸先洗
果然會有少少顏色水走出黎,但冇甩色
鋪落床後....


我真係好覺得好靚呀!!!!訓落又舒服
今次既成功經驗令我地都有衝動繼續淘,因為實在太抵了!!

婚前輔導第一課

今日我地終於上左第一次既婚前輔導啦

雖然同機構,但我都係第一次黎呢間中心

上到去,先係填下資料,平時幫CLIENT填得多,自己填都係第一次

感覺好特別,哈哈

我地既counselor好好笑容,佢自我介紹時話自己都已經結左婚10年

亦做左輔導十幾年,佢個樣完全唔似呀

我好相信,有經歷既人,真係講句野都可以大聲D

而今日既輔導,令我同MR LI都好感動...

我流左好多次淚...

一開始,講下行政野

然後佢問左我地4條問題,第一係互相介紹對方,第二係點解要結婚,第三係點解要做婚前輔導

最後係今日既心情

佢一早畀左心理準備我地,話分享途中會適當地打岔,所以有時我地可能傾到好遠

但佢只會係重要既point打岔,曾經有人答呢4條問題講左3個sessions

過程中,佢幫MR LI解開了教會的心結,今節佢都擺左好多時間係MR LI身上

從我地既說話中帶出了MR LI既努力,壓力

好享受大家好坦白舒服咁傾計

聽到對方對自己既欣賞,從細節中感受愛

結果我地只係答左兩條,已經2.5個鐘..哈哈哈

但時間過得好快

最後問及今日既心情,我好感恩我決定要做婚前輔導

我一直相信呢個係互相發現既歷程

而今日令我好驚訝,我冇諗過MR LI可以係第一次就解開了心結

令佢睇到更全面既自己,同時亦讓我地更肯定彼此過去既努力

很老套,但真的,在患難中最能體現愛

而我倆,平凡的兩個人,知道永遠有個人支持自己,愛護自己

已經充滿恩典了

而MR LI則好坦白咁講最初覺得冇需要做婚前輔導

但今日後佢覺得好感恩,神一直係我地當中

明白要放低1D包袱,先可以繼續向前行

亦覺得好值得黎

我聽到都立即回應,做呢行,我好明白要一個男人去做輔導係極困難既事

我好多謝MR LI既勇敢同投入,大家都覺得今日傾完好舒服,好有能量

真係好建議大家去做婚前輔導

我明白好多人都會覺得寧願拎呢D錢去整個candy corner或租多件衫好過

除左因為我做呢行明白輔導既威力外,就係有D野永遠需要人去引導、回顧、反思

當中既過程會令你發現,你既另一半同自己特別既一面

當然,冇寫包單話見完一定好,只係可以等大家為未來做好心理準備

就算發現大家對未來有好大既分歧,都可以趁呢個時間去調整,打好基石
明白大家既心意,攪婚禮都冇咁易忟..哈哈哈

靚既candy corner唔會拉近你同另一半既關係,但婚前輔導可以

結婚既咁多開支入面,有幾多係為自己既未來?

婚前輔導前的功課

話說我地參加的婚前輔導需要我地每次去之前完成一份功課

各自做完之後一齊傾,再EMAIL番畀counselor

早係兩星期前收到份功課

呢次既課題係:是適當時候結婚嗎?

入面有12條問題

我同MR LI終於坐定定做功課

發現,有D問題,真係要諗

又或者係,我地好多時都覺得理所當然,從來都冇諗過

例如會問「什麼使你決定與對方結婚?」「你認為婚姻是什麼?」「你估計婚後生活的困難是什麼?」「你認為美滿的婚姻需要具備什麼條件?」等

我地一齊用左1個鐘各自完成,然後大家一齊傾

我發現,真係可以了解對方既想法多好多

亦會表達到1D平時唔會貿貿然講出口既諗法

連MR LI都覺得好得意,亦表示欣賞

而我做呢行,當然明白婚前輔導既重要,好開心MR LI亦感受到

最得意既係背面一個剔剔表,「你我的相熟程度」,係大家按入面既ITEM去剔

你覺得自己有幾了解,24條入面,我地有16條既答案都一樣!

我地亦會傾番唔一樣既地方,各自既諗法

後日就第一次見counselor啦,好期待我地有更多發現!

藍天白雲PREWEDDING!

11.04.2014

終於到左影PW既大日子啦

我地鬧鐘一響就醒,連MR LI都冇賴床!

我就落去買早餐,仲可以慢慢嘆

由於我地要拎衫同一個喼(裝哂D野入去夠方便!)

所以我地叫左街車,4個字出到觀塘,比我地約既時間早左8個字有多...

於是買本雜誌慢慢睇

MUA好準時到,我就開始慢慢SET頭化妝

一路傾一路發現MR LI好靜,原來...佢等到訓左,哈哈哈

攝影師大約1點上左黎,叫左飯一齊食,我化緊既時候就影住MR LI先

先影麵包超人衫,哈哈,真係once a life time會著到咁

之後越影越忘形,換衫出發去蝴蝶灣啦

on the way果陣,攝影師w叫我地諗定萬一落雨轉咩地點,因為見到個天陰左..

但好感恩,去到沙灘,冇雨不特止仲有藍天!!!

呢個地方係我地一齊既地方,我地都好中意黎,加上呢日係平日

冇咩人bbq,停車場好少車,好舒服呀!!!

然後,攝影師發掘到唔同既角度,我地從來都唔覺,原來呢度可以咁靚!!

影左兩個鐘左右,就要行去中心啦
因為中心只有6-7pm可以畀我地影,上左去,舊同事帶個好消息畀我

就係佢為左就我,轉左個case呢度見,我地可以影耐d都得

太好了,我地係playroom,counter,drop in既地方影

好快又到7:30,我地回程去最後一站-小天地

影既地方唔多,最想帶出一同建立生活既感覺,好開心我地用心設計既小天地可以成為婚照既一部份

影到9點半左右,我地完成任務啦!!

的確令人好攰,但真係好滿足,好多次同mr li對望時,內心都好感動

我真係要結婚啦,同呢個人一齊走落去啦!

第二朝我要番工,攰到震

但收到MUA影既花絮

呢張相我真係好中意,零effect下靚到咁

我立即做左電話wallpaper,哈哈哈

除左多謝天父安排4月最美既藍天畀我地外

更要多謝viwa呢隊傻更更但好專業既crew!

多謝你地令我有自信地行出行入,又可以用盡props
期待見到所有相呀!

因為MR LI做平面設計,攝影師仲OFFER畀我地可能自己排相簿

咦,呢個IDEA都唔錯bor...

終於完成左呢個任務啦

感覺距離結婚又近一大步啦!

在家也能PREWEDDING

之前同MR. LI一早講好,因為我地唔係跟prewedding公司租衫
所以早一日拎衫番去時可以係屋企影相
本身final fit係星期二,佢打黎話改星期三,如果ok就畀我地早一日拎走
唔洗星期四再去多次,所以好順利地星期三拎左番新居

星期四晚
執好野就開始影相
素顏影prewedding真係好難得

只係好似平時咁自拍

原來都可以有另一番風味呢...

影呀影,影到2AM,真係要訓啦,第二朝8點幾就要起身

迎接第一及唯一一次影結婚相啦!!

Prewedding props

今個星期五就影prewedding啦

之前整好左個板,尋日整完花球,其實前晚都完成左一樣
呢個係mr. li付出最多心血架
拍拖期間mr li一直都好勤力,不定期幫我地既公仔換衫
所以到結婚時,係一個好好既回顧,可以再用

其實本身D公仔我地打算痴係絲帶上做一串PROPS
但係太重了,所以就把心一橫將其中兩個公仔變手揸公仔
將絲帶綁上筷子就變得靚靚啦,仲好平添,呢條絲帶係深水步買,好似$3咋,木筷子就外賣多既
而form board連die cut都係$4x

原本諗住絲帶串係有齊呢3個公仔

個心心係ikea既杯墊,之前買落, $19.9/4個
絨布質地,現成野唔洗剪,夠方便,前幾日去仲賣緊

條絲帶係粉藍底白波點架
最後因為太重,只係兩個心心夾住著麵包超人衫既我地
但都好可愛呀!!
Prewedding既props總算完成哂啦
最開心既係,樣樣都可以大日子再用,唔洗再整,HAHAHA

花球DIY workshop

之前團購左Meow Palace Bridal Jewellery and Accessories花球workshop

今日終於上堂啦!

我揀左桃紅色原來整一個花球看似簡單,但都幾考功夫先要用鐵線插住發泡膠波,再用鐵線串珠仔,再襯花,最後托底,串絲帶...經過兩個半鐘,我既花球誕生啦!!我收貨架啦星期五影prewedding,試下出黎個效果先!

導師仲話佢遲D會再攪團購.整證書套添呀!!

婚前輔導-終於落實了

其實一直我都想做婚前輔導

因為工作既關係,好明白有d野靠自己其實傾唔到

輔導既價值在於自己放鬆地係輔導員的引導下睇清楚自己同對方既觀點

婚姻,對我同MR LI黎講係一個承諾,但籌備婚禮時,發覺大家既諗法都有少少出入

做呢行,自己都同家長講得多,原生家庭對一個人既影響好大,什至會帶到將來既家

每個人的背景都唔一樣,既然大家決定一齊建立家庭,共度餘生,

就當然要了解對方對婚姻既期望、婚後既生活等等

開頭MR.LI都唔明點解要做,因為佢覺得自己好清楚點解要結婚

兼且覺得同我傾完計都好舒服,話我可以幫自己做(咁緊係唔得啦)

最後,我努力地解釋,MR LI都同意可以了解多D,其實都係好事

尤其當佢知道婚前輔導係講乜,佢覺得都有需要

上次去婚展見到另一間NGO,5節要$5XXX,仲要去觀塘

所以就冇JOIN到

之後番工同IC講起,佢話其實我地機構有間中心都有,收費按二人收入,機構同工仲有折添

當然,呢間中心既同事出名輔導好得

加上我新入呢間機構,唔識其他TEAM同事,反而有利

於是上星期打去諮詢,好快就有同事覆我

收費原價$4000,同事有九折,$3600/5節,每節兩個鐘

可惜我地宜家距離婚期唔夠9個月,冇得減多$500呢

講解左內容,原來每節輔導前要做功課,各自做完就同MR LI傾

每月見一次,我地仲講左prefer基督徒輔導員添

前日電話中講左兩個日子,好感恩,今日番去睇更表

感恩果日可以DAY OFF!今個月尾就第一次啦!

其實我好期待呀=)

婚前輔導課程

形式 ：以面談輔導形式進行5節課程 (每節約兩小時)

對象 ：適合婚期前至少有九個月的準婚男女 (**備註)

課程內容：

• 回顧戀愛歷程、婚姻意義、對婚姻的期望
• 原生家庭與性格建立
• 溝通技巧、衝突處理、愛之語
• 家庭財務預算、夫妻角色、性別分工、建立基督化家庭 (基督徒適用)
• 姻親關係、性與婚姻、婚後社交生活、幸福婚姻要訣

服務收費：按二人的每月總收入計算
**備註 ：如距離婚期只有四至八個月者，費用加收$500

prewedding-與VIWA的第二次約會

上回提要,我地prewedding搵左VIWA production

三月頭果時上過去簡單throw下ideas,大家一齊傾一輯好"我地"既婚紗相

然後我地就番去努力搵我地想著既衫,地方,定日子...

好感恩,一切都好順利

今日再上去,就係交功課既時間啦

職業病既關係,我當一個PROGRAM咁去做

整理好地點,物資、衫、流程等等

有份野係手,唔洗下下搵相出黎

我地既prewedding將由MR. LI做兄弟時識既朋友操刀

呢個安排令MR LI好放鬆

我地最初打算頭3個地點本身都FIRM左(一棣,保持神秘,影完一次過揭曉XD)

最後本身諗過去青衣/荃灣海傍,但實地去多次,又發現冇咩好影

於是諗住不如去大舞臺影啦,當晚結婚都冇機會影到夜景

咁又可以貫穿到我地既主題

但佢地就覺得車程比較遠,同埋果度可以影既野唔太多

於是又問下我地有咩地方會一齊去得多,比較深刻

講真,宜家既小天地由我倆一齊建立,油油清潔,所有野都一手包辦

佢地覺得呢個IDEA好好,因為入面影到既野可以好DETAIL,更立體呈現我地一齊去建立一個家

比去影擺酒既地方更有意義

而我地一直未油既睡房,當日我地諗住真係會堅油少少

成件事就FIRM左啦!

決定左之後,我地好緊張地諗緊有D野要添置

首要係換窗簾囉,哈哈哈

仲有10日,執靚靚間屋先!

新居進展-冇啦啦買左床

話說我地既小天地一直爭間睡房未油
我地一直都打算復活節攪掂佢
上次實惠送野黎整花左我地幅牆,MR LI打去嘈,來來回回最後先有張9折卡
所以我地都打算去實惠買床
今日行過實惠,見到張油壓床,個間隔兩大格,好實用
於是好快拍左板,仲買埋雅蘭既床褥,最最最重要係,埋單只係$5000頭
比我地原先諗既平左一半*O*
真係好開心,仲定左月尾送貸
我地即將又開始油油之旅啦!

Prewedding gown & 免費婚姻籌備工作坊

定左prewedding日期後,就約左呢日去睇衫
yammie專登幫我搵日師傅林姑娘係度既一日,方便改衫
我地之前揀左外借婚紗,晚裝,男禮各一
換左幾件後,最後FIRM了

哈哈,呢張相真係影得我超瘦

為了保持神秘,比住個後面大家睇下先

MR.LI亦好快拍了板,揀了一件男禮同買左恤衫

8/4再去FINAL FIT,之後10號就去拎衫了

我同MR.LI已經諗住果晚拎衫係屋企素顏影下相,影下即影即有,做番自已

好期待呀!希望當日好天啦=)

去完溫馨,就去食飯,

因為今晚7:00參加左我地既證婚律師舉辦既免費婚姻籌備工作坊

戴律師真係好識攪氣氛,個講座幾有用

主要講下證婚要預備既野,佢仲教左我地讀誓詞既企位,注意事項,物資

有D野真係唔講唔知呢...又或者好多都未諗到咁仔細

遲D會再同戴律師開會,講下我地既故事,令佢有更充份既預備

有佢做證婚真係好放心!

prewedding props-CYYC board

今個星期初買既水松板已經完成左啦!!!

好靚呀,我好中意呀,姊妹們同朋友們都讚口不絕

多謝大家既讚賞呀!我真係好有心機去整架

曾經有諗過數字係右下角,公仔係左下角,但最後拼拼下

發覺咁樣好好,呢2個公仔係我暫時整得最靚最似既一對

多謝MR. LI幫我整紙樣,再由我土剪不織布,痴痴貼貼,再聯下針

出黎個效果好好呀!

呢個牌我地打算prewedding當日用

而大日子當日又可以放係reception

之後又可以係屋企做裝飾呢...

今日同MR. LI又超額完成左

不過佢要拎去印先有得分享呢

大家耐心等下啦

Pre-wedding- props DIY

當日去VIWA開會時都略略傾過會做咩道具去影相
尋日同MR. LI講起,佢怕帶得太多野
咁我又成日三心兩意....好在我地最後都有共識(有血有淚)
其實結婚真係可以令人瘋癲,好易好開心,同時亦會忟
有時聽到對方有意見就自然會起摃,我地未至於鬧交
但確實為呢D野而唔開心過
props一事令我地明白真係要講真係要聽,同埋要明白
好啦,心情起伏完,畢竟結婚都係因為愛,冇理由為呢D野傷害大家感情
所以,我地冇放係心上,只係會拎出黎寸番對方(實在無聊+極欠揍)

今日又放早
下晝決定一齊出去買布同板整我地既名做props
同埋做埋當日擺reception既裝飾

有黎自12蚊店,深水步鐵皮屋,珠仔街同手創

D色非常襯,好啦,我努力啦!

充滿愛的律師信 x van photography confirmed

人人對律師信都聞風色變
結婚呢封律師信都可算係最開心最有愛既律師信啦

隨信附上既結婚需知

我地係收到信之前已經改左一次時間

交齊d資料就攪掂啦,仲有得免費聽結婚講座添!

book到呢個mr li口中好好既律師,又鬆口氣

於是, to do list上又消失左一項啦!

第二樣係big day當日既攝影

今日上去睇完相同片,好中意佢既自然風格

d 相唔會好公式, 於是我地落埋訂,又攪掂一樣啦!

10月交相畀佢做成長片段就ok了!

大壇野拜拜啦!!