2014年3月31日 星期一

prewedding-與VIWA的第二次約會

上回提要,我地prewedding搵左VIWA production
三月頭果時上過去簡單throw下ideas,大家一齊傾一輯好"我地"既婚紗相
然後我地就番去努力搵我地想著既衫,地方,定日子...
好感恩,一切都好順利
今日再上去,就係交功課既時間啦
職業病既關係,我當一個PROGRAM咁去做
整理好地點,物資、衫、流程等等
有份野係手,唔洗下下搵相出黎

我地既prewedding將由MR. LI做兄弟時識既朋友操刀
呢個安排令MR LI好放鬆
我地最初打算頭3個地點本身都FIRM左(一棣,保持神秘,影完一次過揭曉XD)
最後本身諗過去青衣/荃灣海傍,但實地去多次,又發現冇咩好影
於是諗住不如去大舞臺影啦,當晚結婚都冇機會影到夜景
咁又可以貫穿到我地既主題
但佢地就覺得車程比較遠,同埋果度可以影既野唔太多
於是又問下我地有咩地方會一齊去得多,比較深刻
講真,宜家既小天地由我倆一齊建立,油油清潔,所有野都一手包辦
佢地覺得呢個IDEA好好,因為入面影到既野可以好DETAIL,更立體呈現我地一齊去建立一個家
比去影擺酒既地方更有意義
而我地一直未油既睡房,當日我地諗住真係會堅油少少
成件事就FIRM左啦!

決定左之後,我地好緊張地諗緊有D野要添置
首要係換窗簾囉,哈哈哈
仲有10日,執靚靚間屋先!

2014年3月29日 星期六

新居進展-冇啦啦買左床

話說我地既小天地一直爭間睡房未油
我地一直都打算復活節攪掂佢
上次實惠送野黎整花左我地幅牆,MR LI打去嘈,來來回回最後先有張9折卡
所以我地都打算去實惠買床
今日行過實惠,見到張油壓床,個間隔兩大格,好實用
於是好快拍左板,仲買埋雅蘭既床褥,最最最重要係,埋單只係$5000頭
比我地原先諗既平左一半*O*
真係好開心,仲定左月尾送貸
我地即將又開始油油之旅啦!

2014年3月28日 星期五

Prewedding gown & 免費婚姻籌備工作坊

定左prewedding日期後,就約左呢日去睇衫
yammie專登幫我搵日師傅林姑娘係度既一日,方便改衫
我地之前揀左外借婚紗,晚裝,男禮各一
換左幾件後,最後FIRM了

哈哈,呢張相真係影得我超瘦
為了保持神秘,比住個後面大家睇下先
MR.LI亦好快拍了板,揀了一件男禮同買左恤衫
8/4再去FINAL FIT,之後10號就去拎衫了
我同MR.LI已經諗住果晚拎衫係屋企素顏影下相,影下即影即有,做番自已
好期待呀!希望當日好天啦=)

去完溫馨,就去食飯,
因為今晚7:00參加左我地既證婚律師舉辦既免費婚姻籌備工作坊
戴律師真係好識攪氣氛,個講座幾有用
主要講下證婚要預備既野,佢仲教左我地讀誓詞既企位,注意事項,物資
有D野真係唔講唔知呢...又或者好多都未諗到咁仔細
遲D會再同戴律師開會,講下我地既故事,令佢有更充份既預備
有佢做證婚真係好放心!



2014年3月23日 星期日

prewedding props-CYYC board

今個星期初買既水松板已經完成左啦!!!
好靚呀,我好中意呀,姊妹們同朋友們都讚口不絕
多謝大家既讚賞呀!我真係好有心機去整架
曾經有諗過數字係右下角,公仔係左下角,但最後拼拼下
發覺咁樣好好,呢2個公仔係我暫時整得最靚最似既一對
多謝MR. LI幫我整紙樣,再由我土剪不織布,痴痴貼貼,再聯下針
出黎個效果好好呀!

呢個牌我地打算prewedding當日用
而大日子當日又可以放係reception
之後又可以係屋企做裝飾呢...

今日同MR. LI又超額完成左
不過佢要拎去印先有得分享呢
大家耐心等下啦

2014年3月17日 星期一

Pre-wedding- props DIY

當日去VIWA開會時都略略傾過會做咩道具去影相
尋日同MR. LI講起,佢怕帶得太多野
咁我又成日三心兩意....好在我地最後都有共識(有血有淚)
其實結婚真係可以令人瘋癲,好易好開心,同時亦會忟
有時聽到對方有意見就自然會起摃,我地未至於鬧交
但確實為呢D野而唔開心過
props一事令我地明白真係要講真係要聽,同埋要明白
好啦,心情起伏完,畢竟結婚都係因為愛,冇理由為呢D野傷害大家感情
所以,我地冇放係心上,只係會拎出黎寸番對方(實在無聊+極欠揍)

今日又放早
下晝決定一齊出去買布同板整我地既名做props
同埋做埋當日擺reception既裝飾
有黎自12蚊店,深水步鐵皮屋,珠仔街同手創
D色非常襯,好啦,我努力啦!

2014年3月16日 星期日

充滿愛的律師信 x van photography confirmed

人人對律師信都聞風色變
結婚呢封律師信都可算係最開心最有愛既律師信啦
隨信附上既結婚需知
我地係收到信之前已經改左一次時間
交齊d資料就攪掂啦,仲有得免費聽結婚講座添!
book到呢個mr li口中好好既律師,又鬆口氣
於是, to do list上又消失左一項啦!

第二樣係big day當日既攝影
今日上去睇完相同片,好中意佢既自然風格
d 相唔會好公式, 於是我地落埋訂,又攪掂一樣啦!
10月交相畀佢做成長片段就ok了!

大壇野拜拜啦!!

2014年3月15日 星期六

pre-wedding-日子篇

其實當日去完VIWA,都知道會firm呢間
因為各樣野都好好,prewedding黎講價錢都算平,又有質素
但一直未解決到既日子,今日都有突破性進展

話說今日食飯時同ic傾開,講緊夾緊日子影結婚相
我講左我既考慮,換來佢好好地表示11/4其實冇咩特別
就算DO都可以掉,我心裡都覺得呢個比較合適
因為想平日,又唔想拖太耐,加上果個星期一至四都較忙,星期五反而冇咩
加上,連佢都咁講,我更加放心呢日OFF
於是,日子初步有定論
我立即打去溫馨睇下衫果度點,佢話一定趕得切
最緊要我有日期,仲約好左28/3下午去睇衫,因為師傅係度,方便執
呼~~呢兩樣野都OK後,我地終於可以定日子啦!

一切都比想像中順利,~~~笑下啦
晚上又KO多一樣prewedding既野
實在...太感動啦....哈哈哈

2014年3月14日 星期五

9 months to go-目標明確的婚紗展

又到14號了,仲有9個月就結婚啦
當我地一樣一樣咁KO d野時,我開始進入好期待快d到但又唔想咁快到既狀態

今日又有婚紗展
我地既目標好清晰-1. 餅卡  2. HPV針  3. 婚前檢查  4. 花球
好啦,我地五點幾先入到去,又唔算多人
謝謝TIFFANY哥哥的同事帶我地入去
入到去又係我地最唔中意既台灣婚紗攝影,唉,我地離遠已經擰定頭

好啦,目標一:美心
媽媽指定既餅店,好快攪掂
但我地收開餅卡都知,其實好少用,因為舊同事一個小分享,令我地買左另一樣
雖然比餅卡貴,但我相信我既朋友會開心好多
120張紙都幾重架原來

好啦,目標二
我地冇特別指定要邊間
於是就拎左D單張研究
最後,係Kinetics買左婚前檢查同HPV針
同時join檢查同HPV有折,扣扣埋埋$1430兩個人bodycheck
HPV針平均2380/3支
保護大家既野,又有合理價錢,於是又買了

最意外既收穫係
當我地係度攪緊婚前檢查果陣
MR.LI眼甘甘望住隔離個booth,因為佢見到有張相好似佢
睇睇下...咦?!呢間野竟然有我地好想租既野!!
雖然個價錢畀我上網睇貴好多,但果個網好似已經荒廢左咁
於是...我地又落了訂...嘿嘿
但由於呢樣同回禮禮物有關,所以要賣個關子
最開心既係,上星期姊妹們的提議成真了!!!!
而且MR LI仲可以設計加工,實在太好
希望呢個亮點會令大家難忘!

firm埋呢樣,目標只剩花球
但行勻都唔覺今年有擺booth
唯有遲d出去睇啦

最後,買滿$1000可以係會場抽獎
我地其中一份禮物係.....

出門用紅傘一把...哈哈哈
收穫豐富地回家=)


2014年3月12日 星期三

Pre-wedding-與VIWA的第一次見面

VIWA Production係MR. LI做伴郎時其中一個兄弟有份幫手的攝影公司
我地pre-wedding一直打算係香港影,
一來外國對我倆冇特別意思,二來想慳D錢
而VIWA既pre-wedding package都唔錯,於是就約左今日下晝上去了解多D
入到去,walter先問下我地心中既PW係點
我地都覺得要開心,自然,唔洗太chok同cool,之後又會問下我地想係邊影
哈哈哈,其實之前心中只有一個地方,而佢都覺得OK,仲盛讚
為了保持神秘,等我地成左事先公告啦!
佢亦有問我地有咩共同既嗜好,嘩,呢個問題原來好難,我地本身中意笑大家,串大家
對方中意做既野自己會願意陪大家去做
等如佢會陪我去整蛋糕,我會陪佢打機(多謝炸彈人)咁
咁我地叫唔叫冇共同嗜好呀?哈哈哈
我地既功課就係要諗下有咩小道具幫幫手
而且今日仲夾埋日期,最快係4月9號,嘩,真係好快
我只怕衫果度未READY,唔係,我最怕係我更表配合唔到
家下呢兩個月其實都忙到爆炸
今日都有一下真係諗,如果仲係舊公司,我可以隨時拎假,真係有彈性好多
宜家礙於轉左工未夠三個月冇得拎VL,又正值暑期通訊出街,入籤等等
只有夾DAY OFF或星期日去影
確實有點點煩惱,天父呀,畀D智慧黎丫!

2014年3月11日 星期二

花球DIY

話說
踏入三月真係婚禮大突破
我地逐樣逐樣KO左好多野(大野)
好啦,所以開始睇下周邊野

今日食晏,搵搵下結婚花球
搵到呢樣野
咦,好靚喎,上佢個網度睇,原來之前我搵戒指枕果陣已經去睇過
佢有開好多DIY course,其中一個就係整戒指枕,但果時覺得好貴,冇去
今次花球班, $248真係好吸引
於是立即whatsapp mr.li, 佢覺得開心就去啦,雖然細細地,但都可以當裝飾
而我又覺得pre-wedding都可以用
於是,買了,我仲快手地send email去book埋時間
yeah!!忙碌工作中真係好需要做D自己中意既野!

另外,好感恩好攪笑地我搵大日子當日攝影
睇van photography 既相,我又見到大學同學碧咸小姐
因為之前化妝師fanny又係幫過佢化,我又係約左試妝先知
雙重驚喜下,我打左畀佢,問下佢van既野,結婚既野
佢仲介紹我要去婚展訂鮮花球,抵好多咁話
好多謝佢既資訊,今個星期五同mr li出戰婚展,又多一個to see item啦!

好感謝天父安排咁多天使陪我地去籌備婚禮
加油呀!

2014年3月9日 星期日

婦女節姊妹聚

原本今日見面只為交收同埋參觀我地既小天地
點知傾傾下變左結婚姊妹團傾結婚野
Lakshan同kat都係我結婚姊妹團既其中一員
大家一齊brainstorm decoration既野,又諗清楚個主題,仲一齊幫手diy添
有呢2位咁有心既姊妹實在令人太放心+窩心
我地仲決定訂勾公仔手襟花畀兄弟姊妹,當係一份小禮物
多謝大家既意見,令我地有更多諗法!!
錫哂你地呀 ^3^我相信我地好快又會見面,一齊努力!!

2014年3月6日 星期四

律師的煩惱

其實我地一早心儀mr li上上次去飲個律師
因為佢攪氣氛好好,今日打去firm問價,細節
其實一切都ok,於是book左5pm
尋晚fanny建議我地唔好揀7pm,因為會冇時間影相
好啦,一切都ok後,我地好開心又firm多樣野之際
夜晚我同媽媽講firm左律師,佢都ok,人選佢冇所謂
當我一講5pm時......佢開始話冇人會咁早到呀之後人地做咩呀下刪一億字
我知道,佢口中既冇所謂,其實,唔係完全冇所謂
但律師時間背後又牽涉到證婚人.....呀...
好煩之際,我聽詩歌,學習平和
然後又會諗,其實媽媽一向喜歡熱烈重視節日的性格,嫁女的確係一件大事
想多d人見證我簽紙都可以理解
於是,可以傾既問既,我都問左,了解佢真正意願

結婚都係想開心姐,另一個先係真正冇所謂喜歡低調既人
求神畀智慧我地去處理

2014年3月5日 星期三

我找到了!!!!婚紗&化妝!

今日真係好開心,不過呢個開心係由憤怒開始的

話說尋晚Axx'S WEDDING既負責人仲whatsapp我提我今日去睇衫
仲叫我上的士打畀佢,ok,我由沙田特登入去錦上路
一上的士,司機唔多知係邊,我唯有打畀佢,一打,冇開電話,whatsapp得一個剔...
好啦,終於落車,問路人,佢指左我地去一間屋前,我喪打電話,我本身已經遲左少少
約10:30,我等到11:00,最後留言就走了
坦白我好嬲,我唔明點解可以咁,明明尋晚先提完我...但mr.li話等佢覆,睇下佢咩事先
我地出番元朗食飯,佢終於打黎,話因為尋晚入院之後出番黎屋企人冇幫佢開電話 bababalaba
佢不停道歉,亦表明自己從來冇試過咁....
我理解,我明白佢都唔想,但我都唔會再考慮佢了

內心總覺得係神既安排
好在之前mr li做伴郎時撞到舊同事,同事介紹左尖沙咀溫馨新婚服務畀佢,話有大碼衫
於是,我地下午就出發
呢個招牌,一睇就知有番咁上下歷史哈哈
上到去,sales yammie招呼我地,服務態度一流,完全感覺被尊重
佢度完身後,拎左2件婚紗出黎,之後我試上身,幫手著衫個林姑娘超好人
fit到不得了,個款又靚,其實果下我已經好開心,
雖然膊頭有好多濕疹,但成個型好修身,哈哈
重點黎啦,當我打開試身度簾,mr li見到我,佢呆左,個樣好感動
十足十電視見到果d男人見到未婚妻試婚紗出黎個樣咁
其實,我又何嘗唔係,我從來冇諗過自己都可以咁靚,可以著到婚紗
著上身果下真係好感動,腦海亦開始想像當天既情境T^T

咁FIT,我地當然OK啦,仲打算係呢度租衫出去影pre-wedding
yammie好細心地講解收費,最後,八千幾蚊有9套衫,包2套男1套媽媽衫
真係好開心,ko左我一直好逃避既item!

我地約左fanny 7:00試妝, 中間既時間我地去左百利兜個圈
見到有好多野,都畀到靈感畀我地
早幾日睇相先知原來fanny有幫過我大學同學化妝,仲高度讚揚佢
而表姐又話佢朋友話fanny好好人
所以我一直都好有信心

fanny 6點左右whatsapp我話因為肚痛去左睇醫生係大圍趕緊黎話要遲
(呢d咪叫有交帶囉)我當然冇問題
我同mr li悠閒食完飯去starbucks坐左陣
7:15佢就到啦,我地上到去,即刻開始試妝
成個過程都好開心,我地3個一齊傾計,又笑我挨近少少我對眼就成日眨眼
笑下笑下,咁就3個鐘,化完啦
 

呢個係出門既頭,之後仲試左頭,不過d相佢未畀番我呢
不過佢建議我染一染髮,等d層次出d
仲有我對BLING BLING眼

我番屋企時戴住眼鏡,d眼睫毛係咁頂住個眼鏡,哈哈哈
成個妝好自然,mr li都讚呢
不過fanny叫我要努力保濕,先可以更上妝
佢咁好,我地當然落埋訂啦,big day見啦=)

就係咁,今日讓我感受神的恩典
一日好順利咁ko了兩件真係要做既事
感謝主!讓我知道,我也可以很有自信,教我更愛惜衪給予我的身體

我要多謝mr li的舊如事candy,謝謝你讓我知道,總有路走,
多謝你用自己既故事去鼓勵我,
更多謝你介紹左間咁好既婚紗店畀我,
雖然我地素未謀面,但你的無私你的關心令我感激!

我亦要多謝我表姐介紹fanny畀我,等我唔洗走冤枉路!
到你結婚都要搵佢!哈哈哈


2014年3月3日 星期一

病榻中的進度-簽名筆

冇啦啦整個腸胃炎
趁食完藥訓醒又未夠鐘食第二次藥,即最清醒既時間
上網完成左其中一件結婚既周邊事-簽名筆

話說我一直上網見到有間SHOP賣廣告,專用手勾公仔整簽名筆
我覺得好靚好有特色,於是早幾日已經問果間SHOP價錢,佢賣198對
手作既野一定有番咁上下價錢,因為人地真係要自己做,價錢我都覺得OK
但佢之後叫我去相簿揀髮型,我已經覺得有d奇怪,
又話會按客人樣去做,點解要我揀人地既髮型呢
都算,當我send我同mr. li 個graphic樣,即save the date果張圖畀佢
同佢講可唔可以做到個人化d,即我同mr li面上都有好明顯的墨,
佢答我公仔太細,做唔到呢d仔細位
(喂,靜雞雞講你知,呢間野叫"ilove weddixx 愛x嫁"呀)

如是者,我去搵下第二間
點知畀我搵到HandicraftFairy, 佢又有做公仔簽名筆
我見店主有同拉斐特合作攪DIY workshop
即管問下價,$160一對,指定款$180一對
我問下我想要眼鏡同墨算唔算指定,佢話咁少事,照收$160
要6月先有貨我當然冇問題啦,我早咁多搵都係因為想方便自己方便人地
於是就落實order了!
以下圖片取自HandicraftFairy專頁,我問左佢先登架!
好可愛,期待屬於我同mr li的簽名筆
而我更打算自己整多兩支波波筆

當我問緊店主畀唔畀我放相時,閒話講起搵上一間手勾公仔舖既經驗
店主話果間係大陸做的
我突然好明白,點解要揀髮型同埋點解「做唔到」,緊係啦,淘寶做唔到嘛

講起淘寶
實在有太多裝飾濕星野,令人花多眼亂
我已同mr li備案,準備入貨啦!

另一樣睇緊既係證書套,實在有太多朋友結婚冇預備呢樣野
令我印象好深刻,成日提住自己要記住!!